Duvidha. . .

Wohh ajeeb duvidha me tha 

Use lekar 

Sagai se ab tak 

Wohh use jaan toh paaya tha 

Magar samajh nahi saka tha 

Use pasand thi twilight series ki movies 

Magar wohh Ijaazat bhi dekhti thi 

Gossip pasand thi use 

Magar who GST bill bhi samjha sakti thi 

Wohh deri se so kar uth ti thi magar 

Sabse pehle chidiya ke liye daana paani daalti thi 

Wohh samajh jaati thi 

Jo wohh keh nahi paata tha… 

Wohh magar abhi bhi 

Uljhan me tha use lekar 

Shadi ke kuchh din pehle 

Ekk din achanak usne kaha 

Suno, main shadi ke baad 

Kuchh din ghar rehna chahti hu 

Apne sasural me mummy papa ke saath 

Tumhe chutti na mile toh chale jaana 

Par main apna ghar samjhna chahti hu 

Mummy papa ki pasand napasand ko bhi 

Taaki jab bhi hum aayenge 

Mehmaan ki tarah na rahe… 

Uski uljhan dur ho chuki thi… 

Meri kavita aur tum...

Suno, Aaj main tumhe 

Batata hu 

Ki kaise padni hai tumhe 

Meri kavitaa, kahaaniya 

Ab ki jab tumhe main  

Suna nahi sakta.. 

Kyuki ab tum jo nahi ho.. 

Thoda ruko, 

Tv band kar do pehle, 

Ho sake toh akele jaao 

Upar chhat par chaand ke paas.. 

Ab kholo mera blog.. 

Pado do lines shuru ki.. 

Yaad karo wohh din.. 

Suno, Jaldi jaldi se… 

Ya jor jor se mat padna.. 

Thoda rukna jaha comma ho, 

Sochna jaha teen dot ho… 

Khatm hone ke baad 

Ekk baar phirr padna.. 

Shayad tumhe phirr kuch 

Naya sa mile… 

Is tarah se tum 

Meri kahani ki naayika 

Ke kirdar ko sajeev kar do.. 

Apne labo se chhu kar 

Ekk ekk lafz kavita ka.. 

Meri rachna amar kar do… 

Chhote lamhe...

Mere kehne pe bus me, 

Tumhara chunni thik karna.. 

Ya Achanak road cross karte, 

Mera haq se haath pakad lena.. 

Bhukh na lagne par bhi mere saath, 

Saath dene ke liye kuch kha lena.. 

Mere kahi bahar jaane par, 

Station par tiffin dene aana.. 

Aise kayi lamhe, jo chote the, 

Dhyaan na dene par 

 kho bhi sakte the… 

Tumhari yaadon ki gullak me 

Jama kiye hai maine.. 

Yahi meri umra bhar ki kamayi hai.. 

Yahi asal me meri pehli kamayi hai…